Ek kona aakaash . . .

Ek kona aakaash . . .
Itne bade aasmman main se,
Kona ek hamain de deti.n,
Koi naam tumhai.n ham dete,
Koi naam hamain de deti.n.
Itne khel khel leti ho,
Khilti ho khushboo deti ho,
Kahatee yaa, choodi khanakaa kar,
Man ki baat zaraa keh detin
Tumse kuch poochai.n to kaise,
Kaise kahe.n kaho to yaara,
The na jab jawab zabaa.n par,
Binaa sawalo.n ke de deti.n
Dekhi maut paas se tab se,
Hamko jeene ki sudh aayee,
Khushi kahaa.n hain dhoond rahe hai.n,
Apanaa saath zaraa de deti.n.
Sabhi qaayade aur kitaabe.n,
Jeene ke raste kahate hai.n,
Jaan kahaan hai jaan gayee ho,
Hans kar haath zaraa de deti.n !

---

Paas se . . .

Tumhai.n dekhataa hoo.n
Jab paas se mai.n,
Kuchh ek saans letaa hoo.n
Vishwaas se mai.n.
Samandar samandar
Kaha.n tak chaloonga,
Tanha raat bhar yoo.n
Kaha.n tak jaloonga,
Yo.n sheesho.n se bach kar,
Yo.n bheedo.n main chhupkar,
Mai.n apane hi mann ko
Kahaa.n tak chhaloongaa,
Bahut thak gayaa hoo.n
Is aabhaas se mai.n

Tumhai.n dekhataa hoo.n
Jab paas se mai.n !
Har ek dard dil mai.n
Chhupaaye chhupaaye ,
Koi zindagi ko kaha.n tak
Chukaaye ,
Har ek shaam dhoondhali,
Har ek raat kaali,
Sitaare bhi hote hai.n
Kitane paraaye,
Bahut mil gayaa hoo.n
Aakaash se mai.n,
Tumhai.n dekhataa hoo.n
Jab paas se mai.n !

SATYAM SRIVASTAVA